Дзе мог быць Быкаў у Віцебску?

«экзатычная і дзіўная» справа за абласной бібліятэкай і якіх яшчэ славутых імён не хапае гораду

19 чэрвеня 1924 года нарадзіўся беларускі пісьменнік і грамадскі дзеяч, Герой Сацыялістычнай Працы Васіль Быкаў.

Па традыцыі штогод на радзіме нашага земляка, у вёсцы Бычкі Ушацкага раёна, адзначаюцца ўгодкі з яго дня нараджэння.

віцебск, Быкаў, ТБМ

Каля мемарыяльнай шыльды Васілю Быкаву ў Віцебску ў 2016 годзе. Фотаздымак з архіва Віцебскай абласной арганізацыі ТБМ

Але ж, пагадзіцеся, для ўшанавання памяці сусветна вядомага пісьменніка хацелася б зрабіць больш. Віцебская абласная арганізацыя ТБМ імя Ф. Скарыны ў студзені 2017 звярнулася да гарадскіх уладаў з прапановай перайменавання Віцебскай абласной бібліятэкі імя У.І. Леніна ў бібліятэку імя Васіля Быкава.

Напрыканцы зімы прыйшоў адказ за подпісам намесніка начальніка галоўнага ўпраўлення ідэалагічнай работы, культуры і па справах моладзі Віцебскага абласнога выканаўчага камітэта Л.К. Аленскай. У афіцыйным лісце пазначана:

«Сярод чытачоў бібліятэкі шмат асоб сталага ўзросту і прыхільнікаў камуністычных ідэй, якія могуць негатыўна ўспрыняць тое, што імя У.І. Леніна знікне з назвы ўстановы».

Акрамя таго, зазначаецца, што

«ў дадзены момант Віцебскай абласной бібліятэкай разам з абласнымі і гарадскімі ўладамі разглядаецца прапанова віцебскіх мастакоў-графіцістаў пра магчымасць нанясення на адзін з бакавых фасадаў бібліятэкі партрэтнай выявы Васіля Быкава».

Цікава, што ж атрымліваецца: на фасадзе абласной бібліятэкі імя Леніна можа з’явіцца партрэт Быкава?

віцебск, быкаў, мемарыяльная дошка

Мемарыяльная шыльда пісьменніку па вуліцы Суворава. Здымак Сашы Май

Сітуацыю каментуе старшыня Віцебскай абласной арганізацыі ТБМ імя Ф. Скарыны Юрась Бабіч:

«На сённяшні дзень сітуацыя з абласной бібліятэкай, якая мае імя Леніна, мякка кажучы, экзатычная і дзіўная. Васіль Быкаў – асоба, якая вартая ўшанавання ў назве бібліятэкі, тым больш, лагічна было б разгледзець гэтае пытанне ў юбілейны Скарынаўскі год. У афіцыйным адказе пазначана пра магчымасць нанясення выявы Быкава на фасад бібліятэкі, але ж з таго часу прайшло чатыры месяцы, а справа не зрушылася з месца».

Яшчэ адна прапанова да гарадскіх уладаў: наданне адной з вуліц Віцебска імя Васіля Быкава. На гэта ў афіцыйным адказе гаворыцца:

«пытанне будзе разгледжана пры вызначэнні назваў вуліц у адным з новых мікрараёнаў Віцебска са шматпавярховай забудовай. Адначасова можа быць узнята пытанне і пра вуліцу Генадзя Бураўкіна. Вуліца ж Рыгора Барадуліна ў Віцебску існуе з сакавіка 2015 года ў мікрараёне індывідуальнай забудовы ў раёне «Арэхава».

Дзе знаходзіцца Арэхава? На паўднёва-заходняй ускраіне нашага города. Гэта – былая вёска, якая ў 2004 годзе ўвайшла ў склад Віцебска.

«Васіль Быкаў не тая асоба, імем якой можна назваць вуліцу на ўскрайку горада, – расказаў Юрась Бабіч. – У Віцебску столькі абсурдных  для сучаснай Беларусі назваў вуліц : Камуністычная, Савецкая, Суворава, Леніна, што любую з іх можна было б перайменаваць у вуліцу імя Васіля Быкава. Што датычыцца вуліцы імя Рыгора Барадуліна, то гэта нонсэнс, што маленькая вулачка ў невядомым раёне носіць імя сусветна вядомага пісьменніка, якога ў свой час хацелі вылучыць як прэтэндэнта на Нобелеўскую прэмію ў галіне літаратуры».

Мы ж у дзень нараджэння Васіля Быкава вырашылі крыху пафантазіраваць і ўявіць, дзе мог бы быць Быкаў у Віцебску.

Плошча імя Васіля Быкава замест плошчы імя У.І. Леніна

віцебск, плошча, Леніна

Плошча імя У.І. Леніна. Здымак Сашы Май

Бібліятэка імя Васіля Быкава замест бібліятэкі імя У.І. Леніна

Областная библиотека. Фото Владимира Боркова

Абласная бібліятэка. Здымак Уладзіміра Баркова

Вуліца імя Васіля Быкава замест вуліцы Камуністычнай

віцебск, камуністычная

Вуліца Камуністычная ў Віцебску. Здымак Сашы Май

А які варыянт падабаецца вам? Выказвайце свае меркаванні ў каментарыях.

Таксама прапануем малавядомыя факты з жыцця нашага земляка і ўзгадаць, як у мінулым годзе ў выніку злачынства пайшла з жыцця сястра Васіля Быкава – Валянціна Уладзіміраўна.