знайсці сабе пару ці фітнэс па-беларуску
Пайду я Цярэшку жаніць,
Аж мая галоўка баліць,
Аж мае ножачкі млеюць –
Не магу за дзедам бегаць.
Аж мае ручачкі вянуць –
Не магу на дзедзьку глянуць.
Калядная гульня «Жаніцьба Цярэшкі» —традыцыйная забава моладзі, вядомая яшчэ са старажытных часоў. Гэты ўнікальны абрад выконваўся толькі зімою, у дні гадавых свят. Сутнасть гульні заключалася ў тым, каб маладыя людзі змаглі пазнаёміцца і адшукаць сабе пару. Як і заведзена па традыцыі, свята ў «Торвальдзе» пачалося з песняў дый скокаў.
Зразумела, раней «Жаніцьба Цярэшкі» мела больш сур’ёзны характар і ладзілася ў хаце ці карчме, дзе ўсё распачыналася з вясёлых танцаў.
У «Торвальдзе» хлопцы і дзяўчаты спрабавалі сябе ў традыцыйных народных забавах «Явар», «Падушачка», «Яшчар».
На «Жаніцьбе Цярэшкі» маладыя людзі адразу апынуліся ў самым цэнтры падзей і нават не заўважылі, як сярод гасцей з’явіліся так званыя «бацька» з «маткай». Паводле мудрай шматвяковай традыцыі менавіта яны павінны былі сватаць «дзетак».
Маладых хлопцаў і дзяўчат, гатовых ажаніццца, знайшлося багата. Кожную пару падводзілі да стала, каб пакаштаваць духмянага хлеба і гарэлкі, як на сапраўдным вяселлі.
Жаніцьба скончылася няскора, бо пасля яе надышоў час вясёлых скокаў.
А вось як святкавалі Цярэшку ў Задзвінні ў 2015 годзе, можна з асалодай паглядзець тут.
Дарэчы, у нашых продкаў з утвораных пад час гульняў пар часта атрымліваліся сем’і ў жыцці. А можа і ў «Торвальдзе» хутка зайграе сапраўднае вяселле?!
А як праходзіла незвычайнае сямейнае свята «Гулі ў бабулі» ў Заронаве, можна пачытаць у матэрыяле нашых карэспандэнтаў вось тут . Калі ж з’явіцца жаданне як найлепей ведаць родную мову, культуру, традыцыі, прапануем наведать модныя сучасныя курсы «Мова нанова».