поўная праграма свята
15 верасня на поўначы Беларусі, у Міёрах, адбудзецца экалагічнае свята «Жураўлі і журавіны Міёрскага краю», якое стала традыцыйным для рэгіёна і пройдзе ўжо ў сёмы раз.
Госці свята змогуць пачаставацца журавінамі і журавінавымі стравамі, а таксама паўдзельнічаць у назіранні за жураўлямі з арнітолагамі грамадскай арганізацыі «Ахова птушак Бацькаўшчыны».
Менавіта ў верасні пачынаецца сезон збору карысных ягад – журавінаў, запасамі якой багатая Міёршчына. І кожны год больш за 4000 шэрых жураўлёў і дзясяткі тысяч гусей розных відаў спыняюцца на адпачынак на мясцовым балоце Ельні падчас восеньскай міграцыі.
Сёлета свята набыло новы імпульс для развіцця, стаўшы часткай вялікага праекта «Разам для грамады і прыроды: узмацненне працэсу развіцця ў Міёрскім раёне праз супрацоўніцтва мясцовай улады і грамадзянскай супольнасці».
Праект рэалізуецца пры фінансавай падтрымцы Еўрапейскага саюза і скіраваны на паляпшэнне жыцця жыхароў Міёршчыны на аснове рэлізацыі прынцыпаў устойлівага развіцця рэгіёна.
Намесніца старшыні Міёрскага райвыканкама Алена Усцінаўна Шалонька:
Дзякуючы Праекту і святу госці атрымаюць выдатную магчымасць «пакаштаваць на смак» гасціннасць і таленавітасць жыхароў Міёрскага краю. Акрамя гэтага, падчас свята будзе запачаткавана цікавая ініцыятыва − стварэнне унікальнага Музея жураўлёў і журавінаў, экспанаты для якога будуць сабраныя высілкамі мясцовых жыхароў і ўсіх жадаючых.
Ксенія Малюкова, спецыялістка па кампаніях і акцыях АПБ:
Гэты фэст мы ладзім толькі адзін раз у год, таму запрашаем «злавіць» рэдкую магчымасць паназіраць за тысячамі шэрых жураўлёў на самым вялікім верхавом балоце ў Беларусі, пачаставацца журавінамі i сустрэць Мёрскую восень!
Пачатак свята ў 11.00, афіцыйнае адкрыццё – ў 13.00.
Месца правядзення – гарадскі парк «Паўвостраў», г. Міёры.
Насычаная праграма свята уключае ў сябе конкурс і прэзентацыю «Жураўліны кірмаш-2019» сярод сельскіх падворкаў Міёрскага раёна, выступленні творчых калектываў Міёршчыны і гасцей з Латвійскай Рэспублікі. Упершыню на сцэне гарадскога парка «Паўвостраў» выступіць фольк-гурт PAWA.
Адметнасць свята – магчымасць разам з грамадскай арганізацыяй «Ахова птушак Бацькаўшчыны» і арнітолагамі паназіраць за жураўлямі і пабываць на экасцежцы на балоце Ельня.
А таксама гасцей чакаюць шматлікія майстар-класы для дзяцей і дарослых, дэгустацыі, інтэрактыўная фотазона, актыўнасці на пляцоўцы АПБ, праца Праектнай пляцоўкі, мабільны планетарый, квесты, экашопінг і шмат-шмат іншых цікавостак!
«Жураўлі і журавіны Міёрскага краю» – свята як мінімум «5 у адным»!
- яднанне з прыродай (прайсціся па балоце Ельні і паназіраць за жураўлямі)
- адпачынак у добрай кампаніі на вясёлым свяце
- умацаванне фізічнага стану (дзякуючы гаючаму паветру і «эліксіру здароўя» – журавінам)
- эканамічная выгода: шопінг на кірмашы майстроў
- новыя ўражанні і сюрпрызы
Праграма экалагічнага свята «Жураўлі і журавіны Міёрскага краю» ў 2019 годзе
9-14 верасня
- экалагічны тыдзень «Чароўны край малой Радзімы» (установы адукацыі Міёрскага раёна);
- конкурс на найлепшага здатчыка журавінаў.
10 верасня
Паседжанне клуба маладой сям’і «Жураўлінаю сцежкай».
14 верасня
- урачыстая рэгістрацыя шлюбу «Жураўлінае вяселле» (каля скульптуры «Жураўліная вернасць», г. Міёры, плошча Леніна, 14);
- урачыстае вітанне «Жураўліная вернасць» (каля скульптуры «Жураўліная вернасць»);
- міжраённы турнір інтэлектуальнай гульні «Што? Дзе? Калі?» на кубак старшыні Міёрскага раённага выканаўчага камітэта (Міёрскі раённы Дом культуры);
- адкрыты кубак раёна па валейболе сярод жаночых каманд (Міёрская ДЮСШ);
- конкурс «Смак журавінаў» (па зборы журавінаў) сярод прафсаюзных аб’яднанняў і ахвочых.
15 верасня
09.30 – семінар «Міжнароднае супрацоўніцтва як інструмент устойлівага развіцця Міёрскага раёна» (малая зала Міёрскага раённага выканаўчага камітэта).
Гарадскі парк:
11.00 – адкрыццё выставы-продажу вырабаў народных майстроў «Жураўліная скарбонка» з правядзеннем майстар-класаў;
12.00 − выступленне калектываў г. Даўгаўпілса і Крустпілскага краю (Латвія);
11.00 – 13.00 – конкурс «Жураўліны кірмаш-2019» сярод сельскіх падворкаў Міёрскага раёна;
11.00 – 15.00 – прэзентацыя сельскіх падворкаў;
13.00 – урачыстае адкрыццё свята, узнагароджанне пераможцаў раённых конкурсаў:
− па добраўпарадкаванні;
− сярод сельскіх падворкаў;
− па зборы журавінаў і найлепшых здатчыкаў журавінаў;
− захавальнікаў Ельні;
− «Гатуем з журавінаў разам» (ад раённай газеты «Міёрскія навіны»).
14.00 – тэатралізавана-канцэртная шоу-праграма «Жураўліная нота»;
16.30 – канцэртная праграма фольк-групы «PAWA”;
22.00 – святочная тэматычная дыскатэка «Жураўліны опэн-эйр».
Цягам дня:
Прэзентацыя пляцоўкі грамадскай арганізацыі «Ахова птушак Бацькаўшчыны”:
- праца інфармацыйнага стэнда (інфармацыя пра працу ў межах праекта «Разам для грамады і прыроды: Міёрскі раён», пра тэрыторыю Рэспубліканскага ландшафтнага заказніка «Ельня», пра дзейнасць арганізацыі);
- назіранне за жураўлямі (з 10.00 да 14.00 кожную гадзіну адпраўленне аўтобуса ад Гарадскога парку, работа арнітолагаў на полі, запіс на экскурсію, суправаджэнне экскурсіі);
- экскурсіі па экасцежцы (суправаджэнне спецыяліста);
- інтэрактыўная фотазона «Жураўлі і журавіны − 2019» і майстар-клас для дзяцей;
- майстар-клас «Адчуй сябе жураўлём»;
- тэматычны аквагрым;
- «Жураўліны квэст»;
- выраб экасувеніраў.
Праектны офіс прапануе:
- праца інфармацыйнага стэнда (інфармацыя пра Праект «Разам для грамады і прыроды: Міёрскі раён»);
- майстар-клас па пляценні з траў;
- роспіс пернікаў з выявамі журавінаў і жураўлёў;
- продаж расады садовых журавінаў і дурніц;
- Фотасушка “Гісторыя свята «Жураўлі і журавіны Міёрскага краю»;
- акцыя «Створым музей разам” (пачатак фарміравання калекцыі будучага Музея журавінаў і жураўлёў);
- продаж сувеніраў.
Таксама вас чакае:
- прэзентацыі-дэгустацыі і продаж прадукцыі беларускіх прадпрыемстваў;
- продаж журавінаў «Менш пластыку – больш журавінаў»;
- выстава экалагічнай літаратуры «Журавель-асветнік» (ад Міёрскай цэнтральнай бібліятэкі і Сектара спорту і турызму Міёрскага раённага выканаўчага камітэта);
- выстава краязнаўцы Вітольда Ермалёнка «Малая Радзіма пачынаецца з зямлі»;
- дзіцячая гульнёвая праграма «Вясёлы жураўлік»;
- праца моладзевай арт-пляцоўкі «Пакаленне NEXT» – квэст «Мой горад», конкурсная праграма для моладзі;
- экапляцоўка «Новае жыццё ў абмен на крышачкі»;
- «Як стварылася планета Зямля” (фільм, работа мабільнага планетарыя);
- «Журавель запрашае» (бясплатнае наведванне і экскурсійная праграма па візіт-цэнтры «Ельня», Міёры, вул. Кірава, 4а).
Журавли, журавіны и Ельня. Самый уютный фестиваль в Миорах. Как это было в 2017 году.
Ельня и журавли: Все «фишечки» уютного миорского праздника в 2016 году.
