у літаратурным альманаху творы амаль 50 аўтараў Віцебшчыны
Чарговы нумар літаратурнага альманаха «Ратуша» прэзентавалі ў Віцебску ў арт-пабе «Торвальд» у мінулую суботу.
У зборнік увайшлі творы на рускай і беларускай мовах амаль 50 аўтараў з нашага горада і вобласці.
Гэта як вядомыя творцы, сябры Саюза беларускіх пісьменнікаў, такія як Франц Сіўко, Уладзімір Папковіч, Міхась Мірановіч, Марыя Баравік, Алена Гінько і іншыя, так і пачаткоўцы.
Альманах, які складаецца з раздзелаў «Паэзія», «Проза», «Пераклады», «Літаратуразнаўства», «Дзецям» і «Гумар», быў надрукаваны ў выдавецтве «Кнігазбор» у Мінску і стаў ужо чацвёртым у гэтай серыі.
Асаблівасць нашай «Ратушы» ў тым, што мы даём магчымасць надрукаваць свае творы моладзі, – распавяла ўкладальнік альманаха, старшыня Віцебскага абласнога аддзялення ГА «Саюз беларускіх пісьменнікаў» Настасся Лазебная (творчы псеўданім – Стася Наркевіч). – У кожным выпуску можна пабачыць новыя імёны. Думаю, мы будзем працягваць гэтую традыцыю, таму запрашаю ўсіх ахвотных далучыцца да выдання пятага нумара альманаха.
Многія аўтары альманаха прысутнічалі на прэзентацыі ў арт-пабе «Торвальд» і выступілі са сваімі вершамі, празаічнымі ўрыўкамі і нават песнямі перед аўдыторыяй.
Павіншаваць творцаў Віцебшчыны з чарговым нумарам «Ратушы» прыехалі вядомыя беларускія аўтары: старшыня СБП Барыс Пятровіч і яго намеснікі Усевалад Сцебурака і Алесь Пашкевіч.
Калі хто зацікавіўся і лічыць, што яго творы вартыя таго, каб быць надрукаванымі ў чарговым выпуску альманаха, дасылайце іх Анастасіі Лазебнай на адрас alazebnaya@yandex.ru.
У Віцебску прэзентавалі альманах «Ратуша».
