Чарговую «Ратушу» прэзентавалі ў Віцебску

Саша Май

у альманах увайшлі творы як вядомых творцаў, так і пачаткоўцаў

Трэці выпуск літаратурнага альманаха «Ратуша» прэзентавалі ўчора ў Віцебскай абласной бібліятэцы.

бібліятэка, прэзентацыя, "Ратуша"

Загадчык аддзела краязнаўчай літаратуры і бібліяграфіі Ларыса Рагачова вітае гасцей. Фота Сашы Май

У чарговы штогоднік ўвайшлі творы паэтаў, празаікаў, літаратуразнаўцаў, гумарыстаў Віцебшчыны – як сяброў Саюза беларускіх пісьменнікаў (СБП), так і тых, хто толькі пачынае свой творчы шлях у літаратуру.

бібліятэка, прэзентацыя, "Ратуша"

Падчас прэзентацыі. Фота Сашы Май

На пачатку імпрэзы членскі білет Саюза беларускіх пісьменнікаў  уручылі Міхасю Конану.

Затым перад прысутнымі, сярод якіх былі сябры СБП, студэнты і ўсе тыя, хто цікавіцца культурным і літаратурным жыццём роднага горада, выступіў намеснік старшыні арганізацыі паэт Усевалад Сцебурака.

бібліятэка, прэзентацыя, "Ратуша"

Усевалад Сцебурака распавядае пра альманах. Фота Сашы Май

Усевалад расказаў, што ў апошнія гады ў кожнай вобласці Беларусі амаль адначасова сталі выходзіць літаратурныя альманахі. Так, у Магілёве друкуецца «Брама», у Гомелі – «Палац», а ў Віцебску – «Ратуша». А сярод аўтараў як класікі, так і пачаткоўцы. Шлях у альманах адкрыты для ўсіх.

бібліятэка, прэзентацыя, "Ратуша"

Віцебскія творцы падчас прэзентацыі. Фота Сашы Май

Але трэба разумець, што пэўнага адбору не пазбегнуць. Па словах старшыні Віцебскага аддзялення СБП Настассі Лазебнай (творчы псеўданім – Стася Наркевіч), свае творы ў трэці выпуск альманаха падалі больш за пяцьдзясят аўтараў з Віцебшчыны, а надрукаваліся ўсяго сорак. Для параўнання ў першым нумары «Ратушы», які выйшаў у 2014 годзе, было 37 аўтараў, у 2016 годзе, калі свет пабачыў другі нумар, – 46 аўтараў.

бібліятэка, прэзентацыя, "Ратуша"

Добры настрой падчас прэзентацыі. Фота Сашы Май

Адметнасць альманаха Віцебскай вобласці ў тым, што ў ім ёсць такія раздзелы як «Гумар» і «Літаратуразнаўства». Да таго ж, тут прадстаўлены проза і паэзія, як на беларускай, так і на рускай мовах.

Многія аўтары, творы якіх увайшлі ў трэцюю «Ратушу», прысутнічалі на сустрэчы.

Перад гледачамі выступілі Марыя Баравік, якая спецыяльна прыехала на прэзентацыю з Падсвілля, і беларускі цыган з Лондана Вальдэмар Калінін, які перадаў прывітанне ад беларуска-англійскай суполкі і прадэкламаваў колькі вершаў.

бібліятэка, прэзентацыя, "Ратуша"

Марыя Баравік. Фота Сашы Май

Як заўсёды з гумарам прачытаў свае творы вядомы паэт Уладзімір Папковіч.

бібліятэка, прэзентацыя, "Ратуша"

Выступае Уладзімір Папковіч. Фота Сашы Май

Затым выступілі Галіна Сінякова, Наталля Салаўёва, Станіслаў Сівалобаў, Аляксандр Пішчык і іншыя віцебскія паэты.

бібліятэка, прэзентацыя, "Ратуша"

Наталля Салаўёва. Фота Сашы Май

Урывак са свайго празаічнага твора прачытаў загадчык літаратурна-драматычнай часткі Беларускага дзяржаўнага тэатра імя Якуба Коласа Алесь Замкоўскі.

бібліятэка, прэзентацыя, "Ратуша"

Урывак са свайго твора чытае Алесь Замкоўскі. Фота Сашы Май

Апошнімі з віцебскіх творцаў выступілі гумарысты Міхась Мірановіч і Фелікс Бейнер. Апошні па традыцыі прачытаў свае пародыі на вершы сучаснікаў.

Завяршыў сустрэчу сталічны госць, паэт-бард Алесь Камоцкі, які выканаў колькі песень, у тым ліку напісаных па матывах ірландскіх баладаў.

бібліятэка, прэзентацыя, "Ратуша"

Спявае Алесь Камоцкі. Фота Сашы Май

Пасля прэзентацыі кожнаму аўтару альманаха падаравалі экзэмпляр на памяць. А Усевалад Сцебурака прэзентаваў віцебскай абласной бібліятэцы некалькі альманахаў «Ратуша», колькі штогоднікаў іншых беларускіх абласцей і іншыя выданні, сярод якіх трохтомнік дзённікаў і запісаў Рыгора Барадуліна.

Нагадаем, што напрыканцы 2014 года ў Віцебску прэзентавалі першы нумар альманаха «Ратуша», а год таму сталічныя госці наведалі наш горад у рамках праекта «Пяцісотгоднасць» і прадставілі другі нумар штогодніка.