Курсы «Мова нанова Віцебск» адзначылі пяцігоддзе

Таццяна Дубоўская: «Няхай людзі не хвалююцца: шосты сезон абавязкова будзе»

Па-сяброўску шчыра і па-дамашняму цёпла прайшоў выпускны курсаў «Мова нанова Віцебск».

Святочны выпускны. Фота Сашы Май

Усіх, хто сабраўся ў гэты вечар, а такіх было нямала, віталі вядоўцы – Таццяна Дубоўская, Ганна Кажамячанка, Іван Рагавой. Яны зазначылі, што пяць год (менавіта столькі часу існуюць курсы ў Віцебску) прабеглі вельмі хутка, але яны былі вельмі насычанымі.

Сустрэчы з цікавымі людзьмі, выступы літаратараў і музыкаў, інтэлектуальныя гульні, ток-шоу, а самае галоўнае – нязмушаныя зносіны і сяброўства. Усё гэта – курсы «Мова нанова».

Таццяна Дубоўская і Іван Рагавой. Фота Сашы Май

Нездарма адна дзяўчына, што ўпершыню прысутнічала на занятках, заўважыла:

Цікава, што ў адным месцы сабраліся людзі рознага ўзросту, роду заняткаў, прафесіі, па асабістым жаданнні, без прымусу і ім тут падабаецца. Шкадую, што не прыходзіла на курсы раней.

Вось і вядоўцы вырашылі, што галоўнымі героямі гэтага вечера павінны стаць студэнты, як тыя, хто наведваў курсы некалькі гадоў запар, так і тыя, хто далучыўся толькі сёлета.

Сяржук Маркаў. Фота Сашы Май

Шчыра кажучы, я не верыў, што курсы праіснуюць пяць гадоў, – прызнаўся былы вядоўца, тэлевядучы і экскурсавод Сяржук Маркаў. – Памятаю, як усё пачыналася, як было страшна звязвацца з тымі ж музыкамі і запрашаць іх выступіць. А калі мне ператэлефанаваў сам Іван Кірчук – гэта быў нібы званок ад Бога. І, уяўляеце, людзі, калі даведваліся, што іх чакаюць на «Мова нанова Віцебск», пагаджаліся прыехаць і даць невялічкі канцэрт.

Іван Рагавой і Ганна Кажамячанка. Фота Сашы Май

Каб нагадаць, як весела і плённа прайшлі гэтыя пяць год, мовананоўцы падрыхтавалі ролік з відэасюжэтамі і фотаздымкамі, на якіх студэнты з лёгкасцю пазналі сябе.

Вядоўцы падзякавалі сваім студэнтам і ўладальніку «Торвальда» Віталю Броўку. Фота Сашы Май

Несумненна, для многіх стала сюрпрызам, калі вядоўцы пачалі віншаваць самых актыўных удзельнікаў курсаў і ўручаць ім дыпломы. За інфармацыйную падтрымку словы падзякі былі выказаныя журналістам, а за магчымасць праводзіць заняткі ў цэнтры горада уладальніку «Торвальда» Віталю Броўку.

Студэнты курсаў атрымалі дыпломы. Фота Сашы Май

Падчас узнагароджвання студэнтаў. Фота Сашы Май

Да віншаванняў далучыліся і госці – вядомыя ў Віцебску людзі, якія ў свой час выступалі на курсах у якасці запрошаных лектараў. Гэта: пісьменніца, журналіст, старшыня Віцебскай філіі Саюза беларускіх пісьменнікаў Анастасія Лазебная, бард Міхаіл Рубін, мастацтвазнаўца Аляксандр Лісаў, актрыса тэатра імя Якуба Коласа Раіса Грыбовіч.

Настасія Лазебная і Міхаіл Рубін. Фота Сашы Май

Раіса Грыбовіч  правяла рэпетыцыю купальскага  карагода. Фота Сашы Май

Сапраўдным падарункам стаў амаль двухгадзінны канцэрт беларускага спевака і музыкі Зміцера Вайцюшкевіча.

Зміцер Вайцюшкевіч. Фота Сашы Май

Няхай людзі не хвалююцца: шосты сезон абавязкова будзе, – запэўніла вядоўца курсаў Таццяна Дубоўская. – Зараз мы сыходзім на летнія вакацыі, а ўжо напрыканцы верасня зноў збяромся ва ўтульнай зале «Торвальда». Таму прыходзьце самі, прыводзьце сяброў і знаёмых. У нас вы лёгка знойдзеце аднадумцаў і зможаце цікава правесці час. Хачу падзякаваць усім, хто быў побач з намі гэтыя пяць год. Вы – самыя лепшыя.

5 прычын наведваць курсы «Мова нанова» ў Віцебску.

«Вашаму гадаванцу не важна, на якой мове вы размаўляеце». Кранальны відэаролік ад «Мовы нанова — Віцебск».