Вершастрэлы
Сарока і салавей
— Нашу я плёткі на хвасце,
Таму такі даўгі расце.
Пачуў сароку салавей:
— А што нясеш ты ў галаве?
Розная тактыка
Муха хітрая — лятае
Вакол нас, і тым яна
Лепшая за авадня:
Той нахабна ўсіх кусае.
Задавака
— Я — амаль што верталёт:
У мяне такі ж палёт!
— Ты ўсяго пырх-страказа, —
Конік з траваў адказаў.
Неразбярыха
Здараецца ў жыцці
Падчас неразбярыха:
Крычаць на камара,
Хоць кроў п’е камарыха.
Хто герой?
— Паглядзі, які я бурны!
Ты такою век не будзеш, —
Вадаспад раку ўшчувае.
Адказала ціха тая:
— Плынь мая твой шум збівае —
Я цярплю цябе, трываю…
Яўген ХВАЛЕЙ, Мінск