Вядомая калекцыя брэнда «Луч», прысвечаная непаўторнасці беларускай мовы, атрымала працяг: выпушчана лімітаваная серыя аднастрэлачных гадзіннікаў «Жы-шы». Такім чынам, новая серыя падтрымлівае і развівае галоўную ідэю калекцыі 2019 года, якая была прысвечана гукам «[дз’]» і «[дж]».
Абедзьве мадэлі гадзіннікаў серыі, арыентаваныя на ўніверсальны стыль «унісэкс», вытрыманы ў той жа стылістыцы, якая была характэрная для папярэдняй лінейкі калекцыі. Навінкі гэтага года брэнд прадставіў пад сімвалічным хэштэгам #часдлямовы — прэзентацыя мадэляў прымеркавана да Міжнароднага дня роднай мовы, які адзначаецца 21 лютага.
Цікавай асаблівасцю дызайну новай лімітаванай серыі сталі нанесеныя на цыферблат спіралі са слоў, у якіх прысутнічаюць склады «жы» або «шы». І гэта яшчэ адзін спосаб падкрэсліць, наколькі глыбока мова ўбудаваная ў нацыянальную ідэнтычнасць: візуальна такое рашэнне нагадвае гадзічныя кольцы дрэваў ці адбіткі пальца. Незвычайным рашэннем стала таксама выкананне нумерацыі гадзін не традыцыйнымі лічбамі, а пропіссю — і зноў жа па-беларуску.
На задняй накрыўцы змешчаны стылізаваны ўзор беларускай вышыўкі. Яшчэ адным элементам яе дызайну стала празрыстае акенца, праз якое можна бачыць работу механізма.
Перадзаказ лімітаванай серыі гадзіннікаў у рознічных магазінах «Луч» стартуе з 21 лютага, а з 23 лютага заказаць навінкі можна будзе ў інтэрнэт-магазіне luch.by. Асноўны старт продажаў адбудзецца 11 сакавіка.
