29 лістапада ў Цэнтры народных рамёстваў і мастацтваў “Задзвінні” адбылося выступленне гурта “Нельга забыць”. Імпрэза прысвячалася 84-годдзю з Дня нараджэння Уладзіміра Караткевіча.
Мінскі гурт «Нельга забыць», лідарам якога з’яўляецца Міхал Бараноўскі, быў створаны напрыканцы 2009 года адмыслова пад вершы Караткевіча з рамана “Нельга забыць, альбо Леаніды не вернуцца да зямлі”.
У прыватнай гутарцы Міхал паведаміў нашаму карэспандэнту, што гурт з’яўляецца для яго хобі, хоць і звязаным з працай (ён супрацоўнік Літаратурнага музея Максіма Багдановіча ў Мінску). Два астатнія выступоўцы таксама маюць іншы занятак у жыцці – Надзея Процька (драматычны вакал, скрыпка), вядомая з гурта Pawa і гітарыст, які працуе ў будзённасці дызайнерам. Цікава, што музыкі працуюць не толькі з вершамі Караткевіча. Зусім не так даўно яны запісалі праграму «Mertvets» на вершы Максіма Багдановіча.
Імпрэза ў “Задзвінні” пачалася з прамовы конкурса на чытанне вершаў Уладзіміра Караткевіча. І нягледзячы на тое, што выступоўцай была толькі адна дзяўчына, пачатак атрымаўся вельмі пранікнёным і адухоўленым. Насця, выхаванка гімназіі № 8, прачытала верш паэта “У векавечнай бацькаўшчыне клёны..” і атрымала прыз ад “Задзвіння”.
Напачатку імпрэзы Міхал Бараноўскі паведаміў, што праграма ўяўляе сабой уражанне ад рамана Караткевіча”Нельга забыць”. Галоўны герой твора жыве ў Маскве і піша вершы, якія і пакладзены ў аснову імпрэзы. Троху больш за дзесяць кампазіцый гурта – гэта суцэльны драматычны рок-выступ, які перамяжоўваецца вершамі і вытрымкамі з рамана Караткевіча.
